Poesie
‘E racconte d’ ‘o nonno…poesia di A. Serra e E. Mammato
Ma comm’è strana ‘a vita…
nu nonno s’assètte ‘o nepote ‘nzino
e nce racconta ‘o sbarco d”a guerra d”o ’43…
Isso ‘o sente attentamente
e nun se perde niente,
anze s”o ffà ripetere quanno addà mangia’,
e doppo ca è fernuto
dice vicino ô nonno:-
“Quann’ ire tu criaturo, pe’ te fa’ mangia’
che t’avevano raccuntà?”
‘O nonno nun risponne
e fa finta ‘e nun capi’, ‘o guaglione ‘nziste ancora
e ll’ addimmanna forte, forte:-
” Ma a te che te cuntavano,
‘a guerra d”o ‘15- ’18 ?”
A chistu punto ‘o nonno
s’attizza bona ‘a pippa
e dice ‘a verità:-
” Quann’ io ero criaturo fatte ce ne cuntavano
anze in quantità, ma no pe’ ce fa’ mangia’…
ma pe’ ce ‘o ffà scurda’!”
DIETA AL MASCHILE di Antonio Serra ed Enzo Mammato
Mia moglie mme diceva
che io ero chiatto assaje
pe stu fatto….penzaje
‘ e nun ‘ngrassa’ cchiù!
Pigliajo na ricetta
che ‘o miedeco me dette,
anzi, pure a vuje
ve dico
chello ca maledico:
“30 grammi ‘e vermecielle
cu ddoje pummarulelle,
nu fascio ‘e vrucculillo
e 6 grammi ‘e muzzarella….
nu grissino pe’ pane”…
ca fuje ‘a miez’’e mmane!
L’aggio fatto pe’ tre mise
mm’è rimasto sulo ‘a cammisa!
mia moglie vò ‘o calore
addò aggi’’a piglia’?
Aggio perzo, pure, ‘o core
e nun tengo niente cchiù:
‘o cazone fuje ‘a cuollo?
Ma io c’’o porto a ffa’
…si nun ce sta ‘a dinto
chello ca ce avesse sta’ ?!?!?!
Cannarutizia ‘e Pasca 2020! di Enzo Mammato
A chi preferisce à Pàsca, ‘o Natale
pecché sta festa dura cchiù d’ ‘o dovuto,
nun sulo p’ ‘a vacanza duzzinale
ma p’ ‘o mangia’, e vole fa’ ‘o saputo,
i’ lle dico e ‘o cunfermo per iscritto
ca ‘int’a sta brutta pandemia,
nun vale chello ca s’è sèmpe ditto:
a Pàsca se fa ‘a famme, mamma mia!
Pe’ chist ‘anno Pasca s’ è rivalutato:
nuje stammo mangianno ‘a nu mese
ato ca una e sola bona jurnata,
ccà tenimmo tutt’ ‘e panze appese:
e mò facimmo ‘a pizza c’ ‘a pummarola
e mò pruvammo ‘o ppane sott’ ô furno
e…”assagge stu cazone c’ ‘a scarola!”
…Accussì, succede ca se fa a tturno!
Tu daje ogge chesto a mme:
sanguinacce, zeppule e casatiello,
dimane dongo chest’ ato io a tte:
tortano ‘e pane e cosce ‘ajniello!
Ogge faccio ‘e gnocche a lla romana
dimane faje ‘e tortellini â bolognese
‘e facce io, senza guante ê mmane,
né tu cu mascharine nfacce stése…
Mò vène ‘e figliemo ‘o compleanno
‘o nomme ‘e Vicienzo fuje ajere…
pure si nunn è ll’urdemo e’ ll’anno
aspettammo… ‘e ce mangia’ ‘a pastiera!