Walter Cavallaro

Poesie


U spitala e Catanzaru

Tra tanti cosi brutti a Catanzaru
Una ti fa fara sulu u sangu amaru
trasi sanu e nesci cchi stai mala
nta sa città stu benedittu spitala
codici a culuri..russu giallu o jancu
uri e uri è normala ca unu è stancu
anziani stremati e nsonnicchjiati
ti vena a gulia sulu e fantalati
arriva a grazia ma ti fannu trasira
ala Madonna e Portu t’hai e rivolgira
ppe n’appendicita t’haioperara
na peretta ca t’hai e sbacantara
all’addoma focareddhu e Sant’Antoniu
t’abbuffasti a ncunu matrimoniu?
a figghjiumma 6 uri 4 punti e sutura
trasiu prima n’atru ppe na puntura
genti spediti ala casa ca eranu sani
ali parenti poi c’hannu morutu nte mani
na signora prenotata ala geriatria
nzinu u turni soi… ci vo l’autopsia
cambia u discursu si hai a pila
u jornu dopu e on fai mancu a fila
si capiscetta bonu a morala
alu spitala non jira si stai mala

 

 

A mbidia

Nu vizzu bruttu cchi ancora dura
on c’è vaccinu e nuddha cura
cca duva nui nda colpiscia assai
i genti i fatti loru on si fannu mai
paroli si moltiplicanu stracangiati
ti controllanu e diffondanu cazzati
ali social spessu cci damu a curpa
sulu cu l’oricchji sunnu na vurpa
a ogni problema si va ala basa
avera ma si guarda sulu nta casa
si tu mi guardi e parri e mia
si colpitu e na brutta malatia
a definiziona è subba Wikipedia
sa patologia si chiama “MBIDIA”
tocca u ficatu e gugghjia u sangu
attentu si subba l’atri jetti fangu
ognunu sapa dintru cchi senta
gioii doluri e on dicia nenta
on giudicara dissa u Signura
oja a mia domani è a tua l’ura
ricorda bonu ca gabbu e jestimi
tornanu sempra arretu ppe primi
u forta rida cchi problemi davanti
e domana tu u mala toi l’hai davanti

 

 

No alla guerra

immagini visti nte libri e storia
e chiddhi chi dunavanu noia
ppe nui a guerra mondiala
era l’interrogaziona juta mala
e comu nta nu sonnu bruttu
mo si, sta succedendu tuttu
giuvani, fimmini tutti innocenti
a follia e cu on ava sentimenti
si ponnu avira tanti ambizioni
u sangu on ava giustificazioni
u potera oscura i cori potenti
ma genti accussì su veri perdenti
a pacia e l’amura tra tutti i razzi
sinnò daveru ti cadanu i vrazzi
bruttu l’antiproiettola alu pettu
ala capu paura fa n’elmettu
basta bumbi, basta stu scempiu
ali figghjioli sulu st’esempiu?
U cora ciangia giuvani sordati
mugghjieri e figghji preoccupati
ha de finira c’è pocu e fara
nui ppe mo potimu sulu pregara

 

 

L’Anni belli

cu comu a mia nd’ava na quarantina
eppa a gioventù chi fu na cosa fina
e na cosa po ma si vanta
ca fu nu giuvina e l’anni novanta
quandu ppe tuttu potivi ridira
e ma ti diverti bastava na lira
non jivi luntanu senza patenta
4 amici amici e on ti mancava nenta
nenta Whatsapp sulu u portuna
u
massimu era u Nokia mattuna
ppe a zzita luntana ma t’emozioni
c’era l’usanza da cabina a gettoni
ti portavi l’amicu on parravi direttu
respundia u patra e tremava u pettu
a partita a pallona ogni pomeriggiu
subba l’asfaltu puru ccu cielu grigiu
2 petri u super santos o u tangu
si cjiovia eri figu chjinu e fangu
d’estata a spiaggia e u lungomara
ma socializzi non avivi e chattara
davanti a na pizza guardavi l’occhi
mo mori si u telefunu on tocchi
va dicu na cosa schietta e sincera
cchi giuvini e oja nenta mi cangera
.

 

 

A fimmina

a fimmina è sempra bella e golosa
ma quandu t’alliscia vo ncuna cosa
si innamoratu ti vinderi ppe amura
e si tuttu cuntentu nzina cchi dura
baci bacetti massaggi e grattini
l’omini assimigghiianu tutti cretini
va rispettata ccu cora e menta
si a tratti mala si nu perdenta
ma u rispettu va ricambiatu
sinnó ti trovi cornutu e mazziatu
si iddha subitu noti ca si vinda
ammogghjia u biscottu e vavattinda
si oja o domana va e fini in miseria
resta ccu ttia sulu si è seria
ca u destinu quandu menu l’aspetti
ta manda a fimmina ppe fara progetti
cci guardi u pettu e u d’arretu
e quandu c’è iddha ti senti completu
u nomu soi alu cora ti cusi
e sai ca chiddha nu jornu ta spusi
e si  a tentaziona ti passa  davanti
pensa ca a sceglisti ammenzu tanti
l’anticu u dissa e non ti scordara
quantu nu pilu e fimmina po tirara